Një tjetër rast tragjik ka ndodhur këtë të shtunë në vendin tonë. Një grua ka humbur jetën sonte në Gjakovë, pasi ka rënë në ujë nga ura e Moglicës.

Lajmin e ka konfirmuar zëdhënësi i policisë për rajonin e Gjakovës, Sheremet Elezaj.

Ai ka bërë të ditur se viktima fillimisht ishte nxjerrë nga uji me shenja jete, por më pas janë njoftuar nga spitali i Gjakovës se e njëjta ka ndërruar jetë, si pasojë e përkeqësimit të gjendjes.

‘’Rreth orës 19:55 jemi njoftuar se një grua në moshë madhore kishte rënë në ujë nga e ashtuquajtura ‘Ura e Moglicës’, në rrugën ‘Ymer Pula’ në Gjakovë. Patrullat policore, së bashku me njësinë e zjarrfikësve dhe ekipin e emergjencës, kanë dalë menjëherë në vendin e ngjarjes, ku viktima ishte nxjerrë nga uji. Personeli mjekësor i ka ofruar ndihmën e parë dhe më pas ajo është dërguar për trajtim të mëtejshëm mjekësor. Por, rreth orës 21:30 jemi njoftuar nga spitali se gjendja shëndetësore e viktimës ishte përkeqësuar dhe si pasojë ka ndërruar jetë”, ka thënë Elezaj.

Ai ka thënë se organet kompetente janë në vendin e ngjarjes dhe po i kryejnë procedurat e nevojshme hetimore për zbardhjen e plotë të kësaj ngjarje tragjike